Општинското основно училиште „Свети Јоаким Крчовски“ се наоѓа во Крива Паланка на ул. „Св.Јоаким Осоговски“ број 139 и зад себе има богата историја и традиција.
Корените на нашето училиште датираат уште од 1945 година, кога е основана Неполна гимназија во Крива Паланка, која во 1953 година се трансформира во осмолетка -„Јоаким Крчовски“ чиј прв директор бил Левко Арсов, со првата генерација на учители кои ќе го започнат благородното дело на едукација и просвета во кривопаланечко.
Во учебната 1960/61 година во општината работат две осмолетки во Жидилово и Крива Паланка во кои се опфатени 3374 ученици од кои во Крива Паланка 948, а во 1974/75 година се бележи нова функционална поставеност на образованието со 13 осумгодишни и 30 четиригодишни училишта со опфатеност на 4698 ученици.

Во 1985 година се извршило окрупнување и рационализација во образованието и Осмолетката „Јоаким Крчовски“ беше трансформирана во централно основно училиште со 11 подрачни училишта, додека во учебната 1995/96 година наставата ЦОУ„Јоаким Крчовски“ ја посетувале 3215 ученици од кои во подрачните училишта 1049.
Со почетокот на учебната 1996/97 година во општината Крива Паланка се врши реорганизација на основното образование и се формираат 3 основни училишта: „Христијан Тодоровски Карпош“ во с. Ранковце, „Илинден“ и „Јоаким Крчовски“ – кое опфаќа 1700 ученици.
Денес ООУ„Јоаким Крчовски“ спаѓа во развиените училишта и ги опфаќа учениците од централното градско подрачје и околните населби и села од источниот и северен дел од градот, а во негов состав работат паралелки и на Основното музичко училиште.Училиштето својата дејност ја остварува со ученици од I до IX одделение во 12 училишни објекти, од кои 3 во градот и останатите во подрачните училишта: с.Дурачка Река, с.Станци, с.Жидилово, с.Узем, с.Дубровница, с.Подржикоњ, с. Луке, с.Огут и с.Нерав.Во подрачните училишта работат и комбинирани паралелки со мал број ученици.
Како современо и модерно училиште ООУ„Јоаким Крчовски“ беше, е и секогаш ќе биде во чекор со времето и современите достигнувања во образованието и ќе се гордее со своите ученици кои се истакнуваат со своите знаења и способности во различни области во животот.