На 9 декември, учениците од VIII – 1 одделение, под менторство на наставничката Христина Илиевска, активно се вклучија во одбележувањето на Меѓународниот ден за борба против корупцијата. Целта на активноста беше да се подигне свеста кај младите за значењето на чесноста, транспарентноста и одговорноста во секојдневниот живот.
Учениците учествуваа во интерактивна игра преку платформата Wordwall, каде што препознаваа примери на коруптивно и антикоруптивно однесување. На тој начин, на забавен и практичен начин се поттикна нивната способност за критичко размислување и донесување правилни заклучоци.
По завршувањето на играта, секој ученик имаше можност да предложи сопствен пример од секојдневието и да го сподели со одделението. Оваа активност овозможи дискусија за тоа како корупцијата влијае врз општеството и како секој поединец може да придонесе за градење култура на интегритет.
Во завршниот дел, учениците формулираа кратки пораки и ветувања за чесност и праведност, со што симболично ја потврдија својата посветеност кон вредностите на антикоруптивното однесување.
Со вакви активности, училиштето ја нагласува важноста на едукацијата и превенцијата, како и улогата на младите во создавање општество без корупција.
