Секоја година, во првата недела од октомври, се одбележува Неделата на детето – Детска недела, посветена на децата, нивните права, потреби, интереси, таленти и можности за развој.
Како и секоја учебна година, така и во учебната 2026/2027 година, во ООУ „Свети Јоаким Крчовски“ – Крива Паланка беше одбележана Детската недела со низа активности посветени на децата и нивните права, кои произлегуваат од Конвенцијата за правата на детето на Обединетите нации.
Детската недела е потсетник дека секое дете има право на љубов, грижа, образование, игра, почит, еднаквост, слободно изразување и безбедно и среќно детство. Воедно, децата се поттикнуваат да ги развиваат своите одговорности – да се почитуваат себеси, другите и заедницата во која растат.
Во текот на Детската недела беа реализирани различни креативни, едукативни, спортски, музички и забавни активности, преку кои учениците ги покажаа своите знаења, вештини, таленти и достигнувања.
Детската недела е прослава на детството, детската љубопитност, фантазија, искреност, игра и радост, но и можност да се потсетиме на важноста од создавање средина во која секое дете ќе се чувствува прифатено, безбедно, почитувано и вреднувано.
Како круна на активностите реализирани во текот на Детската недела беше свечената приредба по повод приемот на првачињата во Детската организација и нивното положување на свечена заклетва. Свеченоста се одржа на 9 октомври 2026 година. Со песна, игра и стихови, учениците од V одделение им приредија топло и незаборавно добредојде на првачињата, создавајќи прекрасна атмосфера исполнета со радост, заедништво, пријателство и меѓусебна почит.
На свеченоста, директорот на училиштето им посака топло добредојде на сите првачиња во Детската организација и истакна дека децата се нашето најголемо богатство и нашата иднина, во кои треба да веруваме, да ги поддржуваме и да им создаваме услови за успешен развој.
Нека секој училишен ден биде исполнет со детски насмевки, љубов, почит, игра, знаење и можности секое дете да го развива и покаже својот потенцијал.
